عاش افندينا صاحب التكيه
يعيش ويبهدل فينا وف أهالينا
يعيش ويقطع يوم لسنا
ويكتف يوم ايادينا
يعيش ويخرب كمان بيوتنا
ويخرب بيوت حوالينا
عاش افندينا صاحب التكيه
ايه يعني يسيب علينا كلابه المفتريه
ايه يعني ياخد ربع او نص او حتي كل الماهيه
إما اتاوه او غباوه او في صوره اكراميه
أبويا قالي لو كلابه في يوم هانوك او خلعوا في يوم عنيا
أوعاك يابني تتكلم ولا تزعل او حتي تبكي عليا
لتروح يا ولدي فطيس ومالكش عند الناس دي ديه
عاش افندينا صاحب التكيه
أنا مش بقول يا ناس كفايه
يا اخونا انا بس بحكي حكايه
ولو قولت
حد هيمشي في يوم ورايا
ولا تسيبوني لوحدي لكلاب السرايا
أهتف يا كفر قول معايا
عاش افندينا صاحب التكيه