عجبي عليكي يا بلد

• في يوم كنت بدردش مع

  محمد ابن عمك عبد الحميد

  قولت له البلد دي عاوزه صارخه

  بس تكون صارخه من حديد

  لجل ما ينصلح لينا حالها

  ونعرف يمينها من شمالها

  بس منين نجيب فيها العزم الشديد

  إذا كان الجيل الطالع

  كله

  كاسل كله خامل

  زي الطالب البليد

  عوضنا علي الله فيكي يا بلد

  ابنك وعايش فيكي شريد

  رد عليا صاحبي وعلي وشه ضحكه امل

  ماتخافشي علي البلد دي

  ده شعبها شعب عنيد

  كل ما تقول انه مسطول او مغيب

  يظهر له مارد من جديد

  كل ما تقول انه ميت يتولد له

  الف مليون فارس وليد

  وقتها ماصدقتوش و أعتبرته بيحلم

  أو بيحكي عن حلمه السعيد

  لحد ما في يوم شوفت الولاد خارجه تصرخ

  خارجه و لابسه عليها بدله شهيد

  قولت عجبي عليكي يا بلد

  مهما اتفرقوا فيكي ولادك

  من صرخه واحدة تلميهم من جديد